Ia 500 kirolari hurbilduko dira Zumaiara

15: 30etatik aurrera, herritarrentzako super esprint distantziakoa izango da Zumaiako triatloiei hasiera emango diena.

Biharkoa gainera, iaz bezala, Zumaiako Triatloi Taldeak paratriatletentzako zirkuituak egokitu ditu eta 15: 30ak baino minutu batzuk lehenago hasiko da proba.

Super esprint proban, 350 metroko igeri egiteari, 10 kilometroko txirrindularitzari eta 2 kilometro eta 500 metroko oinezko lasterketari aurre egin beharko diete.

Geroago, 17: 00etan, esprint distantziako proba hasiko da kirolari federatuentzat. 750 metro egingo dituzte igerian, 20 kilometro txirrindularitzan eta 5 kilometroko oinezko lasterketarekin amaituko dira.

Zumaiarekin amaituko da Euskadiko triatloi zirkuituko denboraldia. Datorren astean Bilbao Bizkaia Triathlon hasiko da (bertan Europako 6 txapelketa egongo dira modalitate ezberdinetan) eta urriaren 2an Euskadiko Duatloi Zirkuitua amaituko da Gasteizko Duatloiarekin.

Triatloi zirkuituaren sailkapenak hemen ikus daitezke (duatloiarena laster argitaratuko dugu).